Heineken-მა ლუდის რეკლამა გადაიღო, სადაც არ ვხვდებით არც ბრუტალურ, მოტოციკლზე ამხედრებულ, ტყავის კურტაკიან მამრებს, რომლებიც ხარბად ეწაფებიან ლუდის ქილებს, არც ფუმფულამკერდიან ქალებს, რომლებიც მაცდურად გვთავაზობენ ლუდს. ოთხწუთიანი ახალი ვიდეორგოლის მსვლელობისას, ლუდი მხოლოდ ბოლოში ჩნდება. ნიშანდობლივია, რომ Pepsi-ს სარეკლამო კრახის შემდეგ, Heineken -ის ახალი რეკლამა ნიმუშია იმისა, თუ როგორ უნდა წარიმართოს სარეკლამო პროდუქციაში მწვავე საზოგადოებრივ საკითხებზე საუბარი.
Heineken-ის ოფიციალურ იუთუბ არხზე ვიდეორგოლი #OpenYourWorld (“აღმოაჩინე შენი სამყარო“) ჯერ კიდევ 20 აპრილს გამოჩნდა, მაგრამ მედიის ყურადღება მან სულ ახლახან მიიპყრო. იგი მაშინვე დაუპირისპირეს Pepsi-ს ჩავარდნილ რეკლამას, რომელიც ქსელში აპრილის დასაწყისში გამოჩნდა და მაშინვე ყველას რისხვა დაიტეხა თავს. არსობრივად, Heineken-ის სარეკლამო ვიდეო სოციალური ექსპერიმენტია. მასში ერთურთის საპირისპირო მოსაზრებების მქონე ადამიანების სამი წყვილი მონაწილეობს, რის შესახებაც თავდაპირველად მათაც არაფერი იციან.
წყვილებში არიან: ფემინისტი ქალი და სექსისტი კაცი, ჰომოფობი და ტრანსგენდერი, კლიმატის ცვლილებების საკითხზე მომუშავე ადამიანი და ის, ვინც ეკოლოგიური პრობლემების მნიშვნელოვნებას უარყოფს. თავდაპირველად, მონაწილეები თავიანთ მოსაზრებებს კამერას უზიარებენ. საქმიან კოსტიუმში გამოწყობილ ბრიტანელ კაცს მიაჩნია, რომ ქალები და კაცები თანასწორნი არ არიან და ქალების ადგილი ქურასთანაა. „დღეს ფემინიზმი კაცების სიძულვილია. ქალებს უნდა გახსოვდეთ, რომ კაცებს ბავშვების გასაჩენად გვჭირდებით“, – ამბობს იგი.
https://www.youtube.com/watch?v=8wYXw4K0A3g&ytbChannel=Heineken
მაისურიანი და მოკლევარცხნილობიანი ფემინისტი გოგონა მას კატეგორიულად არ ეთანხმება. „შემიძლია კი დავუმეგობრდე ისეთ ვინმეს, ვინც ამბობს, რომ ქალის ადგილი სახლშია?“, – კითხულობს იგი.
ვიდეორგოლის ყველა მონაწილე ინდუსტრიულ შენობაში იკრიბება, სადაც თიმბილდინგში სხვადასხვა დავალებების შესრულებას იწყებენ. ჯერ სკამების შეგროვების დავალებას ასრულებენ, სადაც ყველა მონაწილე ერთურთის დახმარებას ცდილობს, შემდეგ კი „კითხვა-პასუხების“ ჯერი დგება: თითოეულმა მონაწილემ საკუთარი თავი ხუთი ზედსართავი სახელით უნდა აღწეროს და სამი თვისება უნდა დაასახელოს, რომელიც მას თანამოსაუბრესთან აერთიანებს: ჩვენ ორივენი კაცები ვართ, საკუთრ თავებში დარწმუნებულნი, ორივენი ხმამაღლა ვსაუბრობთ, ერთმანეთს უკეთ ვიცნობთ, ვიდრე ათი წუთის წინ გაცნობილი სხვა ადამიანები იცნობენ ერთურთს. „მგონია, რომ ადრე ჯარში მსახურობდი? ანუ ყოფილი სამხედრო ხარ? თუ ასეა, ვამაყობ შენით“. „თითქოს შიგნიდან ანათებ. ხვდები ალბათ, რას ვგულისხმობ?“.
მესამე ეტაპზე, მონაწილეებმა ერთობლივად შენობაში ქაოსურად გაფანტული ნაწილებისგან ბარის სადგამი უნდა ააშენონ. ამ დროს, ისინი Heineken-ის ბოთლებს პოულობენ (ვიდეორგოლის მხოლოდ მესამე წუთზე ვხვდებით, რის რეკლამას ვუყურებთ) და სადგამზე სპეციალურად მონიშნულ ადგილებზე ათავსებენ.
სულ ბოლოს, კადრს მიღმა ხმა ექსპერიმენტის მონაწილეებს იმ ვიდეოს ნახვას სთხოვს, სადაც ისინი კამერაში საკუთარი პოლიტიკური შეხედულებების შესახებ საუბრობენ. ახლა მათ უნდა გადაწყვიტონ, ღირს თუ არა ოპონენტთან კათხა ლუდის თანხლებით საკუთარ შეხედულებებზე საუბარი, თუ არა. სამივე წყვილი რჩება.
სინამდვილეში, Heineken-ის ამ რეკლამამაც ბეწვის ხიდზე გაიარა. დიახ, ადამიანები შერიგდნენ და საუკეთესო მეგობრებად იქცნენ, რადგან რეკლამირებული სასმელი დალიეს. რა თქმა უნდა, მათ ამაში თიმბილდინგის არცთუ გონებამახვილური და გაცვეთილი სავარჯიშოები დაეხმარათ. რეკლამის მთელი მომხიბვლელობა იმაშია, რომ Heineken მართლა არწმუნებს მაყურებელს თავის გულწრფელობაში: ვიდეორგოლი მართლაც გულახდილი და ჰუმანური გვეჩვენება.
შესაძლოა, ამის საიდუმლო იმაში მდგომარეობდეს, რომ რეკლამის ავტორებმა სწორედ ის პრობლემები აირჩიეს, რომლის ირგვლივაც დიდი ბრიტანეთის საზოგადოება მეტ-ნაკლებ კომპრომისზე შეთანხმდა. სკამების შეგროვებაში ბრეგზიტის მომხრეებს ან მოწინააღმდეგეებს რომ მიეღოთ მონაწილეობა, შესაძლოა, შედეგი სხვა ყოფილიყო. მაგრამ, ამჯერად, Heineken-ს ყველაფერი წარმატებით გამოუვიდა. გადაიღო მკვეთრად პოლიტიკური ან სოციალური რეკლამა, არავის აწყენინო და თან წარმატებით გაყიდო შენი პროდუქტი – უმაღლესი პილოტაჟის დამსახურებაა. აქ ფეხი მარკეტინგის გიგანტებსაც კი უცდებათ ხოლმე.
