საქართველოში დაწყებული საპროტესტო ტალღის ჩახშობის მცდელობის დროს, საპოლიციო ძალები თავს ესხმოდნენ მანიფესტანტებს და მათ სასტიკად უსწორდებოდნენ. საფარმა ჩაწერა იმ დაზარალებული და ნაწამები ადამიანების ნაწილი, რომლებიც საპოლიციო ძალების მხრიდან არასათანადო და სასტიკი მობპყრობის მსხვერპლები გახდნენ. ვიდეოებში მანიფესტანტები თავიანთ ამბებს გვიყვებიან.

საბა ბრაჭველი, იურისტი

“ვიდექი სპეცრაზმის წინ, რომელიც ხან გვიყვიროდა და გვაგინებდა მეგაფონის მეშვეობით, ხან წყლის ჭავლს გვასხამდა…და ვიგრძენი, რომ თვალში რაღაცა მომხვდა. ეს დიდი ალბათობით, გაზის კაფსულა იყო.”

თათა თავდიშვილი, რეჟისორი

“მახსოვს ძალიან ახლო მანძილიდან ეს გასროლა, რომელიც იყო უწყვეტი, თითქოს ფეხების მიმართულებით გადაატარეს. “

დუტა პეტრიდისი, პროგრამისტი

“15-20 კაცი მირტყამდა, მინიმუმ, უმოწყალოდ.”

თორნიკე ბერაძე, ბავშვთა ფსიქოლოგი

“გამომატარეს სპეცრაზმელების კორდონში, სადაც განუწყვეტლივ, სულ მუშტები მხვდებოდა”

იოსებ ბაბაევი, ბიზნესმენი

“უკვე ნაცემ ხალხს ფურგონში გაზი შემოგვიგდეს”

მიხეილ მეტრეველი, სტომატოლოგი

“ამოიღეს მობილური ტელეფონი, გადაგვიღეს სურათები, გადააგზავნეს თავიანთ დახურულ ჩატებში, შემდეგ, დაიწყეს ვიდეოს გადაღება, სადაც უნდა გვეთქვა, რომ ხარება მაგარი კაცია, რაზეც მტკიცე უარი მიიღეს.”

მინდია გაბაძე, რეპორტიორი

“სრულიად უცხო ადამიანი, შენიღბული, მოვიდა, ჩემს გვერდით დადგა, ძალიან ახლოს და კითხულობდა ჩემს პრეს ქარდს. როდესაც ვკითხე რახდებამეთქი, პირდაპირ სახეში მუშტი დამარტყა.”

მარიამ გაფრინდაშვილი, ჟურნალისტი

“სპეციალური დანიშნულების რაზმს და ე.წ. მორბენლებს ჩავყევი პარლამენტის შენობამდე…მოულოდნელად ვიგრძენი დარტყმა. არ შემიძლია ვთქვა, რა მომხვდა თავში, მაგრამ ეს იყო გაუსაძლისი ტკივილი და მომენტალურად ყველაფერი გაშავდა.”

გიორგი მაისაშვილი, სტარტაპერო

“გავიხედე ჩემი ძმისკენ და დავინახე, როგორ დააგდო სპეცრაზმელმა ერთი დარტყმით და ზედ შედგა. მეც გავიწიე და მეც ასე დამარტყეს. მეც წავიქეცი.მერე მირტყამდნენ და მერე გონება დავკარგე.”

ალექსანდრე ქეშელაშვილი, ჟურნალისტი

“გამოცვივდნენ ნიღბიანი პირები, სპეცრაზმელები, შემათრიეს მათ კორდონში და მცემეს რამდენიმე წუთის განმავლობაში. მირტყამდნენ მუშტებს, რამდენჯერმე, დაცემის შემდეგ, ფეხებსაც, მცირე ხნით გონებაც დავკარგე.”

სალომე გოგებაშვილი, სტუდენტი

“ხელი (თავზე) რომ დავიდე, მთლიანად მქონდა სველი და ეს სისველე იყო სისხლი”

ზვიად მაისაშვილი, გაყიდვების ადმინისტრაციული მენეჯერი

“გარშემო ყველა მხრიდან გვირტყამენ წიხლებს.გავითიშე…თავს ვწევ ძლივს და ამ დროს ერთი პოლიციელი ქუსლს მირტყამს, შემდეგ მეორე პოლიციელი ხედავს ამ ყველაფერს და ფიქრობს, ალბათ, რომ ამას არ ეყო ეს დარტყმაო. მეორედ მთელი ძალით მირტყამს წიხლს, რის შედეგადაც უკვე სრულიად და ბოლომდე ვითიშები.”

საქართველოში პროტესტი კვლავ გრძელდება. მანიფესტანტების მთავარი მოთხოვნები რეჟიმის ტყვეების გათავისუფლება და ახალი არჩევნების ჩატარებაა.